அவரவர் தன்மைக்கு ஏற்ப திருவருளைப் பெற்றுத் தருவது திருவைந்தெழுத்தான நமச்சிவாயவே

நான்காம் திருமுறை

பாடல் 6

சலமிலன் சங்கரன் சார்ந்தவர்க்கு அலால்
நலமிலன் நாள்தோறும் நல்குவான் நலம்
குலமிலன் ஆகிலும் குலத்துக்கு ஏற்பதோர்
நலம் மிக கொடுப்பது நமச்சிவாயவே

அனைவருக்கு ஒரே தன்மையாக காணப்படும் சிவபெருமான், சார்ந்தாரைக் காத்தல் தலைவர் கடன். அது போல தன்னைச் சார்ந்த அடியார்களுக்கு எப்போதும் நன்மையே செய்பவன்; சிவநெறியின்படி ஒழுக்கமாக வாழ்பவர்க்கும், அவற்றில் இருந்து நீங்கி நிற்பவர்க்கும், அவரவர் தன்மைக்கு ஏற்ப திருவருளைப் பெற்றுத் தருவது திருவைந்தெழுத்தான நமச்சிவாயவே

சிவபிரானின் நாமத்தைச் சொல்பவர் எத்தன்மையராக இருந்தாலும், கொடுந்தொழில் புரிபவராக இருப்பினும், ஏழு நரகங்கள் செல்லவேண்டிய பாவங்கள் புரிந்தவராயினும் அவர்களுக்கும் நமச்சிவாய மந்திரம் நன்மையை அளிக்கும் என்று கூறும் சம்பந்தப் பெருமானின் பதிகங்கள் இங்கே நினைவு கூறத் தக்கவை.