மோன மந்திரம் - அசபை - பேசா எழுத்து - திருமந்திரம் 4ம் தந்திரம் பாடல் 1

884 I மோன மந்திரம் - அசபை -பேசா எழுத்து.

போற்றுகின்றேன் புகழ்ந்தும் புகல் ஞானத்தைத் 

தேற்றுகின்றேன் சிந்தை நாயகன் சேவடி 

சாற்றுகின்றேன் அறையோ சிவயோகத்தை 

ஏற்றுகின்றேன் நம் பிரான் ஓர் எழுத்தே.

புகழ்ந்து சொல்லப்படுகிற சிவ ஞானத்தைப் போற்றுகின்றேன்; மனத்தில் உலக நாயகனாகிய சிவன் சேவடியையே தெளிகின்றேன்; அறை கூவிக் கூற முடியாத "சிவயோகம்" பற்றிக் தெரிவிக்கின்றேன்; எம்பிரானாகிய சிவபரம்பொருளின் ஓரெழுத்து மந்திரத்தை உருவேற்றுகின்றேன். அதுவே அசபை, அசபா மந்திரம், மோன மந்திரம், அது பேசா எழுத்து ஆகும். பேசும் எழுத்து 'வ' எனவும், பேசா எழுத்து 'சி' எனவும் கூறுவது தமிழாகம மரபு. 'சிவ' என இணைத்தே ஓதுவது இயற்கை. அதனால் இங்கு 'சி' எனக் கூறப்பட்டது.

அசபா மந்திரம்: வாயால் செபிக்காமல், மூச்சுக் காற்றோடு (சுவாசத்தோடு) இயல்பாக இணந்து இயங்கும் மந்திரம் 'ஹம்ஸ' ஆகும். இதற்கு அம்ச மந்திரம், அங்குசம், அன்ன மந்திரம் என்ற பெயர்களும் உண்டு.

அசபா நடனம்: திருமால் இம்மந்திரத்தைச் செபித்து அறிதுயில் (யோக நித்திரை) கொள்ளும்போது, அவர் இதயத்தில் ஸ்ரீ தியாகேசப் பெருமான் அசைந்தாடினார். இதுவே 'அசபா நடனம்' எனப்படும்.

யோக நெறியில் இருப்பவர்கள், தங்கள் யோகத்தை மந்திரங்கள் இல்லாத 'நிர்ப்பீச யோகமாக' மாற்றாமல், மந்திரங்களுடன் கூடிய 'சபீச யோகமாக' செய்ய வேண்டும். அதற்காக, மந்திரங்களுக்கெல்லாம் அடிப்படையான இந்த அசபா மந்திரத்தை திருமூலர் இங்கு அருளுகிறார்.

• நிர்ப்பீச யோகம் (விதை இல்லாத யோகம்): 'பீசம்' என்றால் விதை அல்லது மந்திரம் என்று பொருள். எந்தவித மந்திர உச்சாடனமும் இல்லாமல், வெறும் மூச்சுப் பயிற்சி அல்லது வெற்று மனதை மட்டும் கவனித்துச் செய்யப்படும் தியானம் 'நிர்ப்பீசம்' எனப்படும்.

• சபீச யோகம் (விதையுடன் கூடிய யோகம்): மூச்சுப் பயிற்சியோடும், தியானத்தோடும் ஒரு குறிப்பிட்ட மந்திரத்தையும் இணைத்துச் செய்வது 'சபீச யோகம்' ஆகும். இங்கு மந்திரம் என்பது மனதை ஒருமுகப்படுத்த உதவும் ஒரு "விதை" போன்றது.

யோக நெறியில் ஈடுபடுபவர்கள் தங்கள் பயிற்சியை வெறும் மூச்சுப் பயிற்சியாக (நிர்ப்பீசமாக) மட்டும் நிறுத்திவிடக் கூடாது என்பது திருமூலரின் கருத்து.

மனம் என்பது குரங்கு போன்றது; அதை சும்மா இருக்கச் சொன்னால் அது அலைபாய்ந்து கொண்டே இருக்கும். எனவே, மூச்சோடு சேர்த்து ஒரு மந்திரத்தையும் இணைத்துவிட்டால், மனம் அந்த மந்திரத்தின் அதிர்வில் மிக எளிதாக ஒடுங்கிவிடும். யோகம் முழுமையடைய மந்திரத் துணை அவசியம் என்பதால், அதை 'சபீச யோகமாக' செய்ய வேண்டும் என்கிறார்.